Paikar E Naaz

غزل

بسا ہوا ہےخیالوں میں کوئی پیکرِ ناز

بُلا رہی ہےابھی تک وہ دلنشیں آواز

وہی دنوں میں تپش ہے وہی شبوں میں گُداز

مگر یہ کیا کہ میری زندگی میں سوز  نہ ساز

نہ چھیڑ اے خلشِ درد بار بار نہ چھیڑ

چھپائے بیٹھا  ہوں  سینے  میں اک عمر کے راز

بس اب توایک ہی دُھن ہے کہ نیند آجائے

وہ دن کہاں  کہ اُٹھائیں شبِ فراق کے ناز

گزر ہی جائے گی ائے دوست تیرے ہجر کی رات

کہ تجھ سے بڑھ کر ترا درد ہے مرا دَم ساز

یہ بے سبب نہیں شام و سحر کے ہنگا مے

اُٹھا رہا ہے کوئی پردہ ہا ئے راز و نیاز

تیرا خیال بھی تیری طرح مکمل ہے

وہی شباب، وہی دلکشی ، وہی انداز

شراب وشعر کی دنیا بدل گئی لیکن

وہ آنکھ ڈھونڈ ہی لیتی ہے بے خودی کا جواز

عروج پر ہے میرا درداِن دنوں ناؔصر

میری غزل میں دھڑکتی ہے وقت کی آواز